रवि र बालेनद्धारा घण्टी बजाएर गरे रास्वपाको प्रथम महाधिवेशन उद्घाटन ।
२०८३ असार ०७, आइतबार
रास्वपाले महाधिवेशन सहभागीका लागि दिउँसो १ बजे उद्घाटन सत्र हुने भनिए पनि उद्घाटन सत्र २ बजे सुरु भएको छ । उद्घाटन सत्रमा भाग लिन चितवनको चर्को घाममा सहभागी समर्थकहरु बिहानैदेखि गेष्ट हाउसको चउर आइपुगेका थिए। अतिथिहरु पनि लगभग सबैजना मञ्चमा आइसक्दा रवि र बालेनका लागि लामो प्रतीक्षा गर्नुपरेको थियो । भरतपुरको ‘गेस्टहाउस’ चौरमा पार्टी सभापति रवि लामिछाने र पार्टीका वरिष्ठ नेता एवम् प्रधानमन्त्री वालेन्द्र शाहले घण्टी बजाएर महाधिवेशनको उद्घाटन गरे । कार्यक्रममा नेपाली काँग्रेसका सभापति गगनकुमार थापा, नेकपा (एमाले)का नेता प्रदीप ज्ञवाली, नेपाली कम्युनिष्ट पार्टीका नेता वर्षमान पुन, राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देल सहभागी छन् ।
यसै गरी पूर्व प्रधानमन्त्री बाबुराम भट्टराई, जनता समाजवादी पार्टीका अध्यक्ष उपेन्द्र यादव, जनमत पार्टीका अध्यक्ष चन्द्रकान्त राउतको सहभागिता रहेको छ । उद्घाटन सत्र सुरु हुँदै गर्दा वर्षा भए पनि समारोहमा मानिसहरूको उल्लेख्य उपस्थिति छ ।
