परीक्षा नियन्त्रण कार्यालयद्धारा एक दुई दिनमा एसईईको नतिजा सार्वजनिक गर्दै, यसरी हेर्नुहोस नतिजा ।
२०८३ बैशाख २७, आइतबार ।
परीक्षा नियन्त्रण कार्यालयले माध्यमिक शिक्षा परीक्षा (एसईई) को नतिजा हेर्न सकिने आधिकारिक वेबसाइट र एसएमएस सेवा सम्बन्धी जानकारी सार्वजनिक गरेको छ। विद्यार्थीहरूले इन्टरनेट वा मोबाइल एसएमएसमार्फत सजिलै आफ्नो नतिजा प्राप्त गर्न सक्नेछन्। कार्यालयका अनुसार, एसईईको नतिजा प्रकाशित भएपछि विद्यार्थीहरूले आफ्नो सिम्बोल नम्बर प्रयोग गरी वेबसाइटमार्फत नतिजा हेर्न सक्नेछन्। नतिजा हेर्नका लागि सरकारले तोकेका आधिकारिक पोर्टल तथा साझेदार वेबसाइट प्रयोग गर्न आग्रह गरिएको छ।
वेबसाइटबाट नतिजा हेर्ने ठेगानाहरू:
इन्टरनेटको माध्यमबाट विस्तृत नतिजा र मार्कसिट हेर्नका लागि कार्यालयले सरकारी तथा निजी क्षेत्रका १४ वटा वेबसाइटहरूलाई अनुमति दिएको छ। प्रमुख वेबसाइटहरू यस प्रकार छन्:
आधिकारिक सरकारी साइट: www.see.gov.np र www.neb.gov.np
नेपाल टेलिकम: www.see.ntc.net.np
कान्तिपुर पब्लिकेसन्स: www.ekantipur.com
इडियु सञ्जाल: www.see.edusanjal.com
खल्ती: https://khalti.com/app
निमा एजुकेशन, फोनिक्स एजुकेशन, एम्बिसन गुरु, मेरो स्टडी, र इन्द्रेणी टाइम्सका वेबसाइटहरूबाट पनि नतिजा हेर्न सकिनेछ। परीक्षा नियन्त्रण कार्यालयले नतिजा प्रकाशित भएपछि यी आधिकारिक माध्यमहरूबाट मात्र आफ्नो नतिजा रुजु गर्न परीक्षार्थी र अभिभावकहरूलाई अनुरोध गरेको छ।
त्यसैगरी, मोबाइलबाट एसएमएस पठाएर पनि नतिजा हेर्न सकिने व्यवस्था गरिएको कार्यालयले जनाएको छ। एसएमएस र आईभीआरबाट नतिजा हेर्ने तरिका
परीक्षार्थीहरूले तल दिइएका सर्टकोडहरूमा एसएमएस पठाएर वा फोन गरेर आफ्नो नतिजा प्राप्त गर्न सक्नेछन्:
- नेपाल टेलिकम: १६०० (SMS/USSD र IVR सेवा)
- जानकी टेक्नोलोजी: ३५००१ (SMS सेवा मात्र)
- एम्बिसन गुरु: ३१०६९ (SMS सेवा मात्र)
यसपालि यति छिटै कसरी सम्भव भयो ।
चैत १९ देखि देशभर सञ्चालन भएको एसइई परीक्षा चैत २९ गते सकिएको थियो। सरकारले नै यसपालि महिना दिनभित्र नतिजा सार्वजनिक गर्ने निर्णय गरेको थियो। उक्त निर्णय अनुसार राष्ट्रिय परीक्षा बोर्डले परीक्षा सकिएको तीन दिनभित्रै नतिजा पठाउन परीक्षा केन्द्रहरूलाई निर्देशन दिएको थियो। कापी जाँच्ने काम पनि मापदण्ड तोकेर परीक्षा भएकै केन्द्रमा गरिएको थियो। त्यस कारण यसपालि उत्तरपुस्तिकाहरू संकलन गरेर अन्यत्र पठाउनु नपर्दा नतिजा चाँडै निकाल्न सम्भव भएको हो।
बोर्डले अन्तिम परीक्षा सकिएपछि सम्बन्धित विषयको नतिजा, उत्तरपुस्तिका तथा परीक्षासम्बन्धी सबै कागजात वैशाख ५ गतेभित्र बुझाउनू भन्ने निर्देशन दिएको दिएको थियो। यस अनुसार वैशाख ९ भित्र देशभरिका सम्पूर्ण जिल्ला शिक्षा इकाईहरूले मार्कस्लिप र उत्तरपुस्तिका बोर्डलाई बुझाएका थिए। मार्कस्लिप र उत्तरपुस्तिका प्राप्त भएपछि कम्प्युटर इन्ट्री गर्ने काम पनि बोर्डले छिट्टै सकेको थियो। अघिल्ला वर्षहरूमा उत्तरपुस्तिका परीक्षण सुरू हुने समयमा यसपालि उत्तरपुस्तिका जाँचसँगै ७० प्रतिशत तथ्यांक इन्ट्रीको कामसमेत सम्पन्न भएको थियो। बोर्डका सूचना अधिकारी लक्ष्मी मरासिनीले एक महिनाभित्र रिजल्ट ल्याउन बोर्डका कर्मचारीले बिहान ६ बजेदेखि साँझ ७ बजेसम्म काम गरेको बताए। समयमै काम सक्न बोर्डले जनशक्ति पनि थपेको थियो।
