मिति २०८२ कार्तिक २१, शुक्रबारका मुख्य मुख्य १० खबरहरु ।

मिति २०८२ कार्तिक २१, शुक्रबारका मुख्य मुख्य १० खबरहरु ।
१.राष्ट्रपति स्वदेश फिर्ता ।
राष्ट्रपति रामचन्द्र पौडेल कतारको राजधानी दोहामा आयोजित ‘सामाजिक विकासका लागि दोस्रो विश्व शिखर सम्मेलन’ मा सहभागी भएर बिहीबार स्वदेश फर्कनुभएको छ । राष्ट्रपति पौडेललाई त्रिभुवन अन्तर्राष्ट्रिय विमानस्थलमा उपराष्ट्रपति रामसहायप्रसाद यादव, प्रधानमन्त्री सुशीला कार्की, गृहमन्त्री ओमप्रकाश अर्याल, परराष्ट्र सचिव अमृतबहादुर राईलगायत सुरक्षा निकायका प्रमुखहरूले सामूहिक रूपमा स्वागत गर्नुभयो । सो अवसरमा नेपाली सेनाले राष्ट्रपति पौडेलको सम्मानमा सलामी अर्पण गरेको थियो । कतारका अमिर सेख तमिम बिन हमद अल थानीको निमन्त्रणामा शिखर सम्मेलनमा सहभागी हुन राष्ट्रपति पौडेल १२ सदस्यीय नेपाली प्रतिनिधिमण्डलको नेतृत्व गर्दै सोमबार दोहा प्रस्थान गर्नुभएको थियो । उहाँका साथमा प्रथम महिला सविता पौडेलसहित नेपाल सरकारका उच्च अधिकारी सहभागी रहनुभएको थियो ।
२. एक थोपा रगत नबग्ने र एकजना घाइते नहुने गरी चुनाव गराउने प्रयासमा छु : प्रम कार्की
द एसिएन नेटवर्क फर फ्रि इलेक्सन्स (आन्फ्रेल) को प्रतिनिधिमण्डलसँगको भेटमा प्रधानमन्त्री कार्कीले शान्तिपूर्ण र भयरहित वातावरणमा स्वच्छ र निष्पक्ष चुनाव गराउन सरकार प्रतिबद्ध रहेको पनि जानकारी दिइन् । ‘हाम्रो मुख्य उद्देश्य नै चुनाव गराउनु हो। यसैमा केन्द्रित छौँ। स्वस्थ निर्वाचनको वातावरण बनाउन नागरिक समाज र पर्यवेक्षकको पनि भूमिका रहन्छ। यहाँहरुको उपस्थितिले निर्वाचन सुरु भइसकेको अनुभूति गराएको छ। ’ प्रधानमन्त्री कार्कीले भनिन् ।
३.सुधनलाई रक्षा बमको जवाफ – गृहमन्त्रीको राजीनामा हैन, परिणाम र काम चाहन्छौँ ।
‘हामी नेपाल’ का संस्थापक सुधन गुरुङले गृहमन्त्री ओमप्रकाश अर्यालको राजीनामा मागेलगत्तै नेपाल जेन-जी फ्रन्टकी संयोजक रक्षा बमले अहिले गृहमन्त्रीको राजीनामा प्रधान विषय नभएको आशय व्यक्त गरेकी छन् ।
४. भारतसँगको सम्झौताबारे मन्त्रालयको प्रष्टोक्ति-ट्रान्समिसन शुल्कको हिस्सेदार विद्युत प्राधिकरण पनि हुन्छ ।
ऊर्जा, जलस्रोत तथा सिँचाइ मन्त्रालयले भारतसँग अन्तरदेशीय विद्युत प्रसारण लाइन सम्झौताबारे प्रेस विज्ञप्तिमार्फत प्रष्टीकरण दिएको छ । मिडियामा आएका समाचार भ्रामक रहेको भन्दै नेपाल र भारतबीच यसअघि भएका सम्झौतामा थप लगानी गर्न २५ वर्षका लागि ‘क्यापासिटी बुकिङ’ गरेको मन्त्रालयको भनाइ छ ।
५.राष्ट्रिय स्वतन्त्र पार्टी (रास्वपा)को विस्तारित बैठक आजदेखि चितवनको सौराहामा सुरु हुँदै ।
विस्तारित बैठकमा केन्द्रीय समिति, केन्द्रीय विभागका पदाधिकारी, प्रदेश सचिवालय, जिल्ला तथा पालिका अध्यक्ष गरि ५ सय १२ जना प्रतिनिधि सहभागी हुँदैछन् । विस्तारित बैठकको तयारीका सम्बन्धमा आज जानकारी दिन आयोजित पत्रकार सम्मेलनमा प्रवक्ता मनिष झाले राजनीतिक, सांगठनिक तथा निर्वाचन केन्द्रित छलफल हुने जानकारी दिए । उनले पत्रकारहरुसँग कुरा गर्दै वर्तमान राजनीतिक विषम परिवेश र घोषित निर्वाचन केन्द्रित छलफल हुनेतर्फ संकेत गरेका थिए ।
६. बालेनविरुद्ध जाहेरी लिएर साइबर ब्युरोमा युवा संघ ।
काठमाडौं महानगरपालिकाका मेयर बालेन्द्र साहले लेखेको एउटा स्टाटसलाई लिएर एमाले निकट युवा संघले प्रहरीमा जाहेरी दिएको छ । उक्त स्टाटसले राजनीतिक दलहरूको मानमर्दन गरेको र मित्रराष्ट्रहरूलाई समेत अपमानित गरेको भन्दै विद्युतीय अपराध अन्तर्गत प्रहरीको साइबर ब्युरोमा जाहेरी दिएकाछन ।
७.अध्यादेशले सहकारीकर्मीको दोहोरो, तेहरो पद खारेज गर्ने ।
सरकारले सहकारी क्षेत्रका समस्या समाधान गर्नका लागि ल्याउने अध्यादेशले दोहोरोरतेहरो पदको विषयमा पनि स्पष्ट पार्ने भएको छ । सहकारीको समस्या दोहोरिन नदिन सरकारले एक व्यक्ति, एक पदमा मात्रै बस्न पाउने व्यवस्था अध्यादेश मार्फत गर्न लागेको हो । पछिल्लो समयमा सहकारी क्षेत्रमा देखिएको सुशासनको कमी, वित्तीय अपचलन तथा ठगीका समस्या बढ्दा सर्वसाधारणको बचत नै जोखिममा परेको छ । लामो समयदेखि सर्वसाधारणले आफ्नो बचत फिर्ता लिनका लागि आन्दोलन समेत गर्दै आएका छन् ।
८. अब देखि प्यान कार्ड स्थानीय निकायबाटै उपलब्ध हुने ।
सरकारले करदाता सेवा कार्यालय बन्द गरेपछि अब देखि प्यान कार्ड स्थानीय निकायबाट उपलब्ध गराउने भएको छ ।
९.जाँचबुझमा असहयोग गरेको भन्दै आईजीपी खापुङलाई ५ सय रुपैयाँ जरिबानाको प्रस्ताव
जेनजी आन्दोलनमा भदौ २३ गते भएको दमन र २४ गतेको आगजनी लगायतका घटनाबारे जाँचबुझ गर्न गठन भएको आयोगले अनुसन्धानमा श्रृङ्खलाबद्ध असहयोग गरेको भन्दै प्रहरी महानिरीक्षक (आईजीपी) चन्द्रकुवेर खापुङलाई पाँच सय रुपैयाँ जरिबानाको प्रस्ताव गरेको छ । आयोगले बुधबार आईजीपी खापुङलाई अनुसन्धानमा निरन्तर असहयोग गरेको आरोपमा सोधेको स्पष्टीकरणमा पाँच सय रुपैयाँ जरिबानाको प्रस्ताव नै रहेको प्रहरी मुख्यालय सम्बद्ध स्रोतले बतायो ।
१०. स्फेरिकल भ्यूमा त्रिवि क्रिकेट रंगशालाको फ्लडलाइट जडान ।
काठमाडौंको कीर्तिपुरस्थित त्रिवि अन्तर्राष्ट्रिय क्रिकेट रंगशालामा फ्लडलाइट जडानको काम अन्तिम चरणमा पुगेको छ । रंगशालामा राखिने ६ वटा फ्लडलाइटका टावरहरू उठाइसकेको अवस्थामा अहिले लाइट जडानको काम भइरहेको छ । १६०० वाटको ७० वटा बत्ती एउटा टावरमा जडान हुनेछ । ६ वटा टावरमा कूल ६ लाख ७२ हजार वाट क्षमताको लाइटले त्रिवि मैदानमा प्रकाश दिनेछ ।