सुकुमवासी बस्तीका विद्यार्थीको पढाइमा सहजीकरण गर्न शिक्षा मन्त्रीको निर्देशन

सुकुमवासी बस्तीका विद्यार्थीको पढाइमा सहजीकरण गर्न शिक्षा मन्त्रीको निर्देशन
२०८३ वैशाख १५ गते
शिक्षा, विज्ञान तथा प्रविधिमन्त्री सस्मित पोखरेलले सुकुमवासीलाई स्थानान्तरण गर्दा मर्कामा परेका विद्यार्थीको सुरक्षा र सहजीकरणबारे छ बुँदे सर्कुलर जारी गर्नुभएको छ । मन्त्रीको निर्देशनपछि मन्त्रालय अन्तर्गतको शिक्षा तथा मानव स्रोत विकास केन्द्रले स्थानान्तरण हुँदा त्यहाँ विद्यार्थीको परीक्षा व्यवस्थापन प्रभावित भएकाले विद्यालय समायोजन तथा समन्वयलाई प्रभावकारी बनाउन विभिन्न निर्देशन तथा अनुरोध जारी गरेको छ ।
केन्द्रले सुकुमवासी हटाउँदा प्रभावित विद्यार्थीलाई पायक पर्ने विद्यालयमा स्थानान्तरण गर्न सहजीकरणका लागि सबै स्थानीय तहलाई अनुरोध गरेको छ । त्यस्तै कक्षा १२ को परीक्षामा सहभागी हुने परीक्षार्थीलाई परीक्षा केन्द्रसम्म जान आवश्यक सहजीकरण गर्न र विद्यालय नै प्रभावित भएको ठाउँमा वैकल्पिक व्यवस्था गर्न÷गराउन अनुरोध गरेको छ । कक्षा १२ को परीक्षा सोमबारदेखि सुरु
भएको छ । सुकुमवासी बस्तीका विद्यार्थी तथा विद्यालयसँग सम्बन्धित अन्य कुनै गुनासो, समस्या या सुझाव भए पनि केन्द्रमा पठाउन स्थानीय तहलाई मन्त्रालयले अनुरोध गरेको छ । शिक्षा तथा मानव स्रोत विकास केन्द्रका प्रवक्ता पराजुलीका अनुसार सुकुमवासी बस्तीमा रहेका तर कक्षा १२ को परीक्षा दिइरहेका विद्यार्थीको तथ्याङ्क सङ्कलन भइरहेको बताउनुभयो । सोमबार साँझसम्म अध्ययन गर्दा सुकुमवासी बस्तीमा बसेर कक्षा १२ पढिरहेका १० जना विद्यार्थीको पहिचान भएको तर उनीहरू अहिले आफन्तको घरमा बसेर परीक्षा दिइरहेको पाइएको पराजुलीले बताउनुभयो ।