प्रतिनिधि सभा निर्वाचन सुरक्षाका लागी अत्यावश्यक सवारी साधन खरिद गरिँदै ।
२०८२ मङ्सिर ०८, सोमबार
आगामी फागुन २१ गतेका लागि तय भएको प्रतिनिधि सभा सदस्य निर्वाचन शान्तिपूर्ण, भयरहित र स्वतन्त्र वातावरणमा सम्पन्न गर्न गृह मन्त्रालयले तीन वटै सुरक्षा निकायका लागि अत्यावश्यक सवारीसाधन तथा सुरक्षा सामग्री खरिदका लागि प्रव्रिmया अघि बढाएको छ । गृहमन्त्री ओमप्रकाश अर्यालले नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका लागि आवश्यक सवारीसाधनको खरिद प्रक्रिया अघि बढाउन तदारुकता देखाउनुभएको छ । गृह मन्त्रालयको कार्ययोजना अनुसार गत भदौ २३ र २४ गते जेनजी प्रदर्शनपछि पूर्ण रूपले आगजनीमा परेर ध्वस्त भएका अत्यावश्यक सवारीसाधनको खरिद प्रक्रिया अर्थ मन्त्रालयले अन्तिम चरणमा पु¥याएको छ । चुनावको वातावरण निर्माण गर्नका लागि पनि तिनै सुरक्षा निकायका लागि अत्यावश्यक सवारीसाधन खरिद
हुन जरुरी भएकाले चुनावअगाडि नै ती सवारीसाधन खरिद भइसक्ने पनि गृह मन्त्रालयले जनाएको छ । गृह मन्त्रालयका अनुसार निर्वाचन सुरक्षाका लागि अर्थ मन्त्रालयबाट नेपाल प्रहरीलाई नियमित बजेटबाट १५६ वटा सवारीसाधनका लागि ३५ करोड ११ लाख रुपियाँ र थप १०६ वटा सवारीसाधन खरिदका लागि ४५ करोड ३० लाख रुपियाँ निकासा हुने क्रममा छ । गृह मन्त्रालयका प्रवक्ता आनन्द काफ्लेका अनुसार नियमित बजेटमार्फत खरिद गरिने सवारीसाधन निर्वाचन सुरक्षार्थ पर्याप्त नहुने अवस्था भएपछि थप रकम सुनिश्चित गरी खरिद प्रक्रिया अघि बढाउन लागिएको हो । यसै आर्थिक वर्षमा नेपाल प्रहरीका लागि ८० करोड ४१ लाख रुपियाँ मूल्यका विभिन्न सवारीसाधन खरिद गर्ने तयारी छ । यी सवारीसाधन खरिदका लागि गृहले अर्थ मन्त्रालयबाट असोज २४ गते नै खरिद अनुमति पाई आवश्यक प्रक्रिया पुगिसकेको छ । प्रहरीले खरिद गर्न लागेका १५६ सवारीसाधनमा ७५ वटा पिकअप भ्यान हुने छन् । यी सवारीसाधन नियमित गस्तीका लागि प्रयोग गरिने भएको छ । त्यसै गरी थुनुवा ओसारपसार गर्ने सवारीसाधन एक थान, २८ वटा कार्यालय प्रयोजन र ४१ वटा सुरक्षा प्रयोजनका लागि खरिद गर्न लागिएको छ । त्यसै गरी केही विद्युतीय सवारी र १० वटा एस्कर्ट पिकअप भ्यान खरिद गर्ने प्रक्रिया अघि बढाइएको छ । अर्थ मन्त्रालयले विपत् उद्धारका लागि तीन वटा र अन्य सुरक्षा प्रयोजनका लागि ५० वटा बोलेरो पिकअप भ्यान खरिदका लागि समेत स्रोत उपलब्ध गराउने भएको छ । तीन वटा दङ्गा नियन्त्रण ट्रक र दुई थान एम्बुलेन्स रहेको मन्त्रालयले जनाएको छ ।
यी सवारी खरिदका लागि नियमित बजेटमार्फत २१ करोड छ लाख रुपियाँ खर्च गरिने छ । सशस्त्र प्रहरीका लागि आवश्यक ५० वटा सवारीसाधन खरिदका लागि थप पाँच करोड छ लाख र राष्ट्रिय अनुसन्धान विभागका लागि कुल छ वटा चारपाङ्ग्रे सवारी खरिदका लागि दुई करोड ८० लाख रुपियाँ उपलब्ध गराउने प्रक्रिया अघि बढेको छ । ४४९ वटा प्रहरी कार्यालय सञ्चालनमा गृह मन्त्रालयको तथ्याङ्क अनुसार जेनजी प्रदर्शनमा मुलुकभर नेपाल प्रहरी अन्तर्गतका ४६५ वटा कार्यालयमा क्षति पुगेको पाइएको छ । सोही प्रदर्शनका व्रmममा ५७१ वटा विभिन्न सवारीसाधन आगजनी तथा तोडफोडबाट ध्वस्त पारिएको थियो । मन्त्रालयका अनुसार कुल ४६५ वटा प्रहरी कार्यालय तथा युनिटमा क्षति पुगेकोमा कात्तिकसम्म कुल ४४९ वटा प्रहरी कार्यालय मर्मतसम्भार भई पूर्ण सञ्चालनमा आइसकेका छन् । बाँकी १६ वटा पनि मर्मत भइरहेकाले यी पनि यथाशीघ्र सञ्चालनमा ल्याउने गरी काम अघि बढिरहेको मन्त्रालयको नीति, योजना अनुगमन तथा मूल्याङ्कन महाशाखाले जनाएको छ । यस्तै सशस्त्र प्रहरी बल, नेपालका ८४ वटा कार्यालयमा क्षति पु¥याइएको थियो भने ६१ वटा सवारीसाधन पूर्ण रूपले आगजनी गरिएको छ । त्यसै गरी राष्ट्रिय अनुसन्धान विभाग अन्तर्गतका दुई वटा भवन तथा तीन वटा जिल्लास्थित कार्यालय भवनमा क्षति पुगेको छ । राअविका ११ वटा चारपाङ्ग्रे र ३० वटा मोटरसाइकल गरी ४१ वटा सवारीसाधनमा क्षति पुगेको थियो । स्रोत गोरखापत्र राष्ट्रिय दैनिक
