चन्द्रकुवेर खापुङलाई भदौ १८ गतेदेखि लागू हुने गरी प्रहरी महानिरीक्षक (आईजीपी) बनाउने निर्णय ।
२०८२ भाद्र १४, शनिबार ।
सरकारले नेपाल प्रहरीको ३२ औँ महानिरीक्षक (आइजिपी) मा चन्द्रकुवेर खापुङलाई नियुक्त गर्ने निर्णय गरेको छ । शुव्रmबार बसेको मन्त्रीपरिषद् बैठकले हाल केन्द्रीय अनुसन्धान ब्युरो (सिआइबी) को प्रमुखमा कार्यरत प्रहरी अतिरिक्त महानिरीक्षक खापुङलाई आइजिपीमा नियुक्त गरेको गृहमन्त्री रमेश लेखकले जानकारी दिनुभयो । गृहमन्त्री लेखकले भन्नुभयो, “कार्यसम्पादन मूल्याङ्कन, वरिष्ठतम र प्रहरी सङ्गठनको नेतृत्व गर्न सक्ने क्षमताका आधारमा भावी प्रहरी महानिरीक्षकमा अतिरिक्त महानिरीक्षक चन्द्रकुवेर खापुङलाई नियुक्त गर्ने निर्णय गरिएको छ ।” हालका आइजिपी दीपक थापा ३० बर्से सेवा अवधिका कारण यही भदौ १८ गते अवकाशमा जाने भएपछि सरकारले भावी आइजिपीमा खापुङलाई एकसाताअघि नै नियुक्त गर्ने निर्णय गरेको हो । खापुङले १९ भदौदेखि प्रहरी महानिरीक्षकको जिम्मेवारी समाल्नुहुने छ । तेह्रथुमको मोराहाङमा जन्मिनुभएका खापुङ २०५२ कात्तिक २६ गते नेपाल प्रहरीको निरीक्षकमा भर्ना हुनुभएको थियो । प्रहरीमा भर्ना भएपछि खापुङ सुनसरी, म्याग्दी, काठमाडौँ, सिन्धुलीलगायतका जिल्लामा खटिनुभएको थियो । सशस्त्र द्वन्द्वका बेला माओवादीसँगको भिडन्तमा खापुङलाई गोलो लागेको थियो । कम्मरमा लागेको गोली ढाडबाट निस्कियो तर उहाँ बाँच्न सफल हुनुभयो ।
२०६४ साउन १ गते प्रहरी नायब उपरीक्षकमा बढुवा हुनुभएका खापुङ संयुक्त राष्ट्रसङ्घीय शान्ति मिसन हाइटीमा खटिनुभएको थियो । हाइटी मिसनबाट खटिएपछि माओवादी सेना समायोजन सचिवालयमा खटिनुभएका खापुङले द्वन्द्व व्यवस्थापनमा समेत काम गर्नुभयो । २०७३ पुस १० गते प्रहरी उपरीक्षकमा बढुवा हुनुभएका खापुङले प्रहरी प्रधान कार्यालयमा विभिन्न विभागमा काम गर्नुभयो ।
२०७७ वैशाख १७ गते प्रहरी वरिष्ठ उपरीक्षकमा बढुवा भएपछि काठमाडौँ उपत्यका अपराध अनुसन्धान कार्यालय प्रमुख बन्नुभएका उहाँ २०८० वैशाख ६ गते प्रहरी नायब महानिरीक्षक(डिआइजी) मा बढुवा हुनुभएको थियो । २०८२ वैशाख ११ गते प्रहरी अतिरिक्त महानिरीक्षकमा बढुवा भएपछि खापुङले केन्द्रीय अनुसन्धान ब्युरो (सिआइबी) को नेतृत्व गरिरहनुभएको छ । समाचार स्रोत :गोरखापत्र दैनिक
