२०८२ भाद्र १, आइतबार ।
अमेरिकाका राष्ट्रपति डोनाल्ड ट्रम्प र रुसका राष्ट्रपति भ्लादिमिर पुटिनबिच भएको साढे तीन घण्टा लामो शिखर वार्ता सम्झौतामा नपुगी समाप्त भएको छ । उहाँहरूबिच शनिबार बिहान ३ बजेसम्म अमेरिकाको अलास्का राज्यमा शिखर वार्ता भएको थियो । अमेरिकी टेलिभिजन संस्था सिएनएनका अनुसार सम्झौतामा नपुगे पनि सम्पन्न शिखर वार्तालाई ट्रम्पले फलदायी भएको बताउनुभयो तर रुस–युक्रेन युद्ध समाधानका लागि अपेक्षित ठोस सहमति भने हासिल हुन सकेन । वार्तापछि आयोजित संयुक्त पत्रकार सम्मेलनमा ट्रम्प र पुटिनले केही महत्वपूर्ण विषयमा सहमति भएको जनाए पनि युद्धविराम
वा अन्तिम समाधानसम्बन्धी ठोस निर्णयबारे केही बताउनुभएन । राष्ट्रपति पुटिनले वार्तालाई आपसी सम्मान र रचनात्मक वातावरणमा सम्पन्न भएको उल्लेख गर्दै युक्रेनको सुरक्षा सुनिश्चित गर्नु
आवश्यक रहेको धारणा राख्नुभयो । साथै उहाँले द्वन्द्वका ‘मूल कारणहरू’ समाधान नगरी स्थायी शान्ति सम्भव नहुने भन्दै युरोपेली मुलुकहरूलाई उक्साउने प्रयास नगर्न आग्रह गर्नुभयो । यद्यपि दुवै नेताले संवाद र समझदारीलाई निरन्तरता दिने प्रतिबद्धता व्यक्त गर्नुभएको छ, प्रारम्भिक चरणको यो वार्ता ठोस उपलब्धि बिना टुङ्गिएको छ । यसैबिच ट्रम्पले पुटिनसँग शिखर वार्ता गरेपछि युक्रेन युद्धविरामसम्बन्धी अन्तिम निर्णय युक्रेनका राष्ट्रपति भ्लादिमिर जेलेन्स्कीको हातमा रहेको बताउनुभएको छ । फक्स न्युजलाई दिएको अन्तर्वार्तामा राष्ट्रपति ट्रम्पले आफू, पुटिन र जेलेन्स्की बिच चाँडै एक संयुक्त बैठक हुने जानकारी दिनुभयो । यद्यपि बैठकको मिति र स्थानबारे विस्तृत विवरण दिनुभएको छैन । “हामीसँग यसलाई पूरा गर्ने राम्रो सम्भावना छ,” ट्रम्पले भन्नुभयो ।
उहाँले युरोपेली मुलुकहरूलाई पनि अलिकति संलग्न हुनुपर्ने उल्लेख गर्दै तर अन्ततः यो जिम्मेवारी जेलेन्स्कीको रहेको बताउनुभयो । सन् २०२१ पछि दुई राष्ट्रपतिबिच भएको पहिलो प्रत्यक्ष भेटवार्ता थियो । रुस र युक्रेनबिच सन् २०२२ को फेब्रुअरी २४ देखि युद्ध जारी छ । यो युद्धले दुवैतर्फका हजारौँ सैनिक र गैरसैनिकको ज्यान लिएको छ । अलास्का शिखर वार्तामा युद्धरत युक्रेन भने सहभागिता थिएन । स्रोत ः गोरखापत्र दैनिक
