कर्मचारी सञ्चय कोषबाट सञ्चयकर्ता तथा योगदानकर्ताको खातामा नाफाको रकम जम्मा

कर्मचारी सञ्चय कोषबाट सञ्चयकर्ता तथा योगदानकर्ताको खातामा नाफाको रकम जम्मा
२०८२ चैत्र १३, शुक्रबार ।
कर्मचारी सञ्चय कोषले गत आर्थिक वर्ष २०८१/८२ मा आर्जन गरेको कुल नाफाबाट सञ्चयकर्ता तथा योगदानकर्ताहरूलाई करिब पाँच अर्ब ३० करोड नाफा वितरण गरेको छ । जसअनुसार, कोषका सञ्चयकर्ताहरूको खातामा करिब पाँच अर्ब १९ करोड र योगदानमा आधारित निवृत्तभरण कोषका योगदानकर्ताहरूको खातामा करिब १० करोड ५५ लाख नाफा जम्मा गरिएको छ । कर्मचारी सञ्चय कोष सञ्चालक समितिको यही फागुन २७ गते बसेको बैठकले कोषको आर्थिक वर्ष २०८१/८२ को वित्तीय विवरण स्वीकृत गर्दै सञ्चयकर्ता तथा योगदानकर्ताहरूको व्यक्तिगत खातामा रहेको सुरू मौज्दात रकममा एक प्रतिशतका दरले हुने रकम नाफाका रूपमा वितरण गर्ने निर्णय गरे बमोजिमको नाफा सञ्चयकर्ता तथा योगदानकर्ताहरूको खातामा जम्मा गरिएको हो । कोषले प्रत्येक आर्थिक वर्षमा आर्जन गरेको कुल नाफाको करिब ९० प्रतिशत रकम सञ्चयकर्ताका लागि नाफाको रुपमा सञ्चयकर्ताको व्यक्तिगत खातामा जम्मा गर्ने र वाँकी रकम विभिन्न कल्याणकारी तथा जगेडा कोषहरुमा राख्ने गर्दछ ।
यस्ता कोषहरुमा रहेको रकम आवश्यकताअनुसार सञ्चयकर्ताको हितमा खर्च हुने गर्दछ । कोषले सञ्चयकर्ता तथा योगदानकर्ताहरूलाई चालु आर्थिक वर्षमा सञ्चित रकममा चार दशमलव २५ प्रतिशतका दरले ब्याज प्रदान गरेको छ भने सञ्चित रकमको सुरक्षणमा सञ्चयकर्ताले कोषबाट पाँच दशमलव ७५ प्रतिशत व्याजमा सञ्चित रकमको ९५ प्रतिशतसम्म विशेष सापटी पाउने गरेका छन् । यस परिप्रेक्ष्यमा कोषबाट सञ्चयकर्ता तथा योगदानकर्ताहरूले पाउने चार दशमलव २५ प्रतिशत ब्याजदरमा नाफा एक प्रतिशतसमेत जोड्दा जम्मा पाँच दशमलव २५ प्रतिशत हुने र विशेष सापटीको ब्याजदर पाँच दशमलव ७५ प्रतिशतमात्र भएकाले सञ्चयकर्ता तथा योगदानकर्ताहरूले प्राप्त गर्ने प्रतिफल भन्दा तिर्नुपर्ने ब्याज शून्य दशमलव ५० प्रतिशतमात्र बढी रहन गएको छ ।
कोषले सञ्चयकर्ता तथा योगदानकर्ताहरूको सेवाकालको आवश्यकता परिपूर्ति गर्ने उद्देश्यले विगतदेखि नै विशेष सापटी, घर सापटी, शैक्षिक सापटी, घर मर्मत सापटी, सरल सापटी र जग्गा खरिद सापटीसमेत उपलब्ध गराउँदै आएको छ । साथै, सञ्चयकर्ता र योगदानकर्ताले छुट्टै योगदान गर्नु नपर्ने गरी कोषले आफ्नै स्रोतबाट सञ्चयकर्ता दम्पत्तीलाई स्वास्थ्य उपचार सोधभर्ना सुविधा उपलब्ध गराउँदै आएको छ भने काजकिरिया अनुदान, सुत्केरी तथा शिशु स्याहार सुविधा, दुर्घटना क्षतिपूर्ति अनुदानलगायतका सामाजिक सुविधाहरूसमेत प्रदान गर्दै आएको छ ।                                                                                                                                     यसअन्तर्गत गत आर्थिक वर्ष २०८१/८२ मा सुत्केरी तथा शिशु स्याहार सुविधाबापत १९ हजार एक सय ११ जना सञ्चयकर्तालाई करिब १४ करोड ३४ लाख, काजकिरिया अनुदानबापत छ सय पाँच जनालाई करिब दुई करोड ४२ लाख, दुर्घटना क्षतिपूर्तिबापत एक सय ७० जनालाई करिब तीन करोड ३९ लाख, स्वास्थ्य उपचार सोधभर्नाबापत पाँच हजार तीन सय ५५ जनालाई ३४ करोड र विशेष आर्थिक सुविधा वापत निजामतीतर्फका एक सय ७२ जना सञ्चयकर्तालाई करिब एक करोड ७३ लाख प्रदान गरिएको छ ।
हाल कर्मचारी सञ्चय कोषमा पाँच लाख ७८ हजारको संख्यामा सञ्चयकर्ता र ९६ हजारको संख्यामा निवृत्तभरण कोषका योगदानकर्ता रहेको छ ।