फिनल्यान्ड विश्वमा र नेपाल दक्षिण एसियामै सबभन्दा खुसी जनता भएको देश : वर्ल्ड ह्याप्पिनेसको रिपोर्ट २०२५ ।

चैत्र २२, २०८१ ।
अमेरिकी संस्था ग्यालपले गरेको सर्वेक्षणले कुन देशका जनता कति खुसी छन् भन्ने आधारमा देशहरूको वरियताक्रम निर्धारण गर्दै आइरहेको छ । यसै क्रममा सन २०२५ को वर्ल्ड ह्याप्पिनेस रिपोर्टमा नेपाल दक्षिण एसियामै सबभन्दा खुसी देशका रूपमा दरिएको छ। संयुक्त राष्ट्रसंघको प्रायोजनमा तयार पारिएको यो रिपोर्टमा जनतालाई जीवनको गुणस्तर कस्तो छ भनी ० देखि १० सम्म अंक दिएर मूल्यांकन गर्न लगाइएको थियो।
हरेक देशबाट सरदर एक हजार जनालाई सामेल गरिएको यो सर्वेक्षणमा संसारभरिका एक लाखभन्दा बढी सहभागी रहेको रिपोर्टमा उल्लेख छ। कुल १४७ देशमा गरिएको सर्वेक्षणमा नेपालीहरूले औसतमा आफ्नो जीवनलाई ५.३१ अंक दिएका छन्। नेपाल सूचीको ९२औं स्थानमा छ। त्यसपछि पाकिस्तान ४.७७ अंकसहित १०९औं स्थानमा छ भने भारत ४.३९ अंकसहित ११८औं, श्रीलंका ३.८९ अंकसहित १३३औं, बंगलादेश ३.८५ अंकसहित १३४औं र अफगानिस्तान १.३६ अंकसहित १४७ औं स्थानमा छ। यो वर्ष फिनल्यान्ड सरदर ७.७४ अंकसहित पहिलो स्थानमा रह्यो भने डेनमार्क ७.५२ अंकसहित दोस्रो, आइसल्यान्ड ७.५१ अंकसहित तेस्रो, स्वीडेन ७.३४ अंकसहित चौथो र नेदरल्यान्ड्स ७.३१ अंकसहित पाँचौं स्थानमा छ। त्यस्तै, कोस्टा रिका ७.२७, नर्वे ७.२६, इजराइल ७.२३, लक्जमबर्ग ७.१२० र मेक्सिको ६.९८ क्रमशः छैठौंदेखि १० औं स्थानमा छन्।