रवि–बालेनबीच बुधबार बिहान लामिछाने निवास बुढानिलकण्ठमा भेटवार्ता ।

रवि–बालेनबीच बुधबार बिहान लामिछाने निवास बुढानिलकण्ठमा भेटवार्ता ।
२०८३ कार्तिक १२, बिहिबार ।
रास्वपा सभापति रवि लामिछाने भेट्न प्रधानमन्त्री बालेन शाह मुख्य सल्लाहकार कुमार बेनसहित रवि निवास बुढानिलकण्ठ गएका थिए । सभापति रवि लामिछानेबीच बूढानीलकण्ठस्थित लामिछाने निवासमा चार घण्टा लामो भेटवार्ता भएको थियो। उक्त बैठकमा विभिन्न विषयमा छलफल भएको अनुमान गरिएको छ । त्यस बैठकको निर्णय आज बस्ने मन्त्रिपरिषदको बैठकमा देखिने छ ।
रवि–बालेनबीच चार घण्टा लामो छलफल, प्रहरी प्रमुखदेखि अध्यादेश र नियुक्तिसम्मका विषयमा कुराकानी
प्रधानमन्त्री बालेन शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच बूढानीलकण्ठस्थित लामिछाने निवासमा चार घण्टा लामो भेटवार्ता भएको छ। बुधबार बिहान सवा १० बजेदेखि दिउँसो सवा २ बजेसम्म भएको भेटमा नेपाल प्रहरीको नेतृत्व, निजामती कर्मचारीसम्बन्धी अध्यादेश तथा विभिन्न विश्वविद्यालयका पदाधिकारी नियुक्तिलगायत विषयमा छलफल भएको बताइएको छ।
***प्रहरी महानिरीक्षकको बारे चासो***
शुरुदेखि नै प्रधामन्त्री बालेन शाह र आईजीपी बिच धेरै आत्मियता नभएको अवस्था र उहाँका विषयमा मिडियामा आईरहेका समाचारहरुले गर्दा भेटवार्तामा नेपाल प्रहरीका महानिरीक्षक (आईजीपी) सम्बन्धी विषयले प्राथमिकता पाएको बताइएको छ। प्रहरी नेतृत्वमा सम्भावित परिवर्तन र नयाँ नेतृत्वका विषयमा प्रधानमन्त्री शाह र सभापति लामिछानेबीच छलफल भएको स्रोतको दाबी छ।
प्रहरी पोशाकलगायत विषयमा कार्कीसँग जोडिएका विवादबारे सिंहदरबारमा संसदीय उपसमितिको बैठक बोलाइएको सन्दर्भमा प्रहरी नेतृत्वको विषय थप चर्चामा आएको हो। रास्वपाले यस्ता विषयलाई आधार बनाएर प्रहरी नेतृत्व परिवर्तनका लागि दबाब दिन सक्ने आकलन गरिएको छ। प्रहरी प्रमुख परिवर्तन गर्नुपर्ने अवस्था आएमा सम्भावित नयाँ नेतृत्वका विषयमा प्रधानमन्त्री शाह र सभापति लामिछानेबीच एकमत नरहेको स्रोतको दाबी छ। यसबारे दुवै पक्षबाट आधिकारिक पुष्टि भएको छैन।
*** अध्यादेश र राजनीतिक नियुक्तिबारे छलफल ***
भेटवार्तामा निजामती कर्मचारीसम्बन्धी अध्यादेश तथा केही जरुरी सरकारी निर्णयका विषयमा पनि छलफल भएको बताइएको छ। विभिन्न विश्वविद्यालयका पदाधिकारी नियुक्ति र अन्य महत्त्वपूर्ण राजनीतिक नियुक्तिका विषयसमेत छलफलको कार्यसूचीमा रहेको स्रोतले जनाएको छ। संवेदनशील विषयमा निर्णय लिनुअघि साझा धारणा बनाउने उद्देश्यले भेट लामो भएको स्रोतको भनाइ छ। तर कुन अध्यादेश वा नियुक्तिबारे के निर्णय भयो भन्ने विवरण सार्वजनिक भएको छैन।
*** रविको भारत भ्रमणबारे  ***
भेटमा सभापति लामिछानेको हालैको भारत भ्रमणका विषयमा समेत छलफल भएको बताइएको छ। लामिछानेले व्यक्तिगत प्रयोजनका लागि गरेको भ्रमणका क्रममा भएका गतिविधि र विषयबारे प्रधानमन्त्री शाहलाई जानकारी गराएको स्रोतको दाबी छ। प्रधानमन्त्री शाहले मंसिरको पहिलो साता नयाँदिल्ली भ्रमण गर्ने तयारी तीव्र पारेको बताइएको छ। सरकारका केही मन्त्री तथा रास्वपाका नेताहरू पछिल्ला दिनमा भारत भ्रमणमा गइरहेका छन्। यी भ्रमण र द्विपक्षीय सम्बन्धका विषयमा भेटवार्तामा कुराकानी भएको हो वा होइन भन्नेबारे भने स्पष्ट जानकारी प्राप्त भएको छैन।