संविधान दिवस तथा राष्ट्रिय दिवस विविध कार्यक्रम गरी मनाइँदै ।

 संविधान दिवस तथा राष्ट्रिय दिवस विविध कार्यक्रम गरी मनाइँदै ।
२०८३ असोज ०३, शनिबार ।
२०६२.०६३ को जनआन्दोलनपछि नेपालमा राजतन्त्रको अन्त्य भई २०६३ को अन्तरिम संविधान बनेको थियो । पहिलो संविधानसभा निर्वाचन (२०६४) ले संविधान बनाउन नसके पछि दोस्रो संविधानसभा निर्वाचन (२०७०) भएको थियो । मुलुकमा भएको दोस्रो संविधानसभाको निर्वाचनपछि गठित संविधानसभाले अथक मेहेनत र लामो विवादपछि नेपालको संविधान, २०७२ जारी गरेको थियो। विसं २०७२ असोज ३ गते राति नयाँ बानेश्वरस्थित तत्कालीन संविधानसभा बैठकस्थल अन्तर्राष्ट्रिय सम्मेलन केन्द्रबाट तत्कालीन राष्ट्रपति डा. रामवरण यादवले यो संविधानलाई जारी भएको घोषणा गरेका थिए।
त्यसपछि नेपालमा असोज ३ लाई संविधान दिवसका रूपमा मनाइँदै आएको छ। यस दिवसमा सरकारले टुँडिखेलस्थित सैनिक मञ्चमा विशेष समारोह गर्दैआइरहेको छ। दिवसको अवसरमा हरेक वर्ष विशेष समारोह आयोजना हुँदै आएको छ । विशेष समारोहमा राष्ट्रपति, उपराष्ट्रपति, प्रधानमन्त्री, प्रधानन्यायाधीश, प्रतिनिधि सभाका सभामुख, राष्ट्रिय सभाका अध्यक्षलगायत उच्च पदस्थ व्यक्तिहरु सहभागी हुने गर्दछन् । प्रदेश सरकार, स्थानीय सरकारका साथै गणतन्त्रवादी राजनीतिक दलहरु, विभिन्न संघसंस्था र नागरिकस्तरमा पनि छुट्टाछुट्टै कार्यक्रमको आयोजना गरेर संविधान दिवस मनाउने गरिन्छ । दिवसको अवसरमा नेताहरुले शुभकामना सन्देश पनि जारी गरेका छन् ।
संविधान संशोधनको अहिलेको प्रमुख राजनीतिक एजेण्डा मुद्दा बनिरहेको छ । हालै बालेन्द्र शाह नेतृत्वको सरकारद्वारा गठित संविधान संशोधन कार्यदलले संविधानका करिब साढे दुई सय धारामा संशोधन गर्नुपर्ने सुझाव दिएपछि त संविधान संशोधन गर्न खोजेको कि पुनर्लेखन गर्ने दिशातिर जाँदैछ ? भन्ने प्रश्न पनि उठिरहेको छ । असिम शाह नेतृत्वको कार्यदलको प्रतिवेदनले शासकीय स्वरूपदेखि निर्वाचन प्रणाली, न्यायपालिका, संघीयता, प्रदेश, स्थानीय तह, संवैधानिक निकाय, मौलिक अधिकार र राज्यका नीतिसम्मका विषयमा संशोधन गर्नुपर्ने औंल्याएकोछ ।