राष्ट्रिय विज्ञापन संघ नेपालद्वारा नुवाकोटका बाढीप्रभावितलाई राहत सामग्री हस्तान्तरण ।
२०८३ भाद्र २७, शनिबार ।
रसुवाको भोटेकोशीमा गत भदौ १० गते आएको अप्रत्याशित बाढीका कारण घरबारविहीन भएका प्रभावित परिवारलाई राहत पुर्याउने उद्देश्यले राष्ट्रिय विज्ञापन संघ नेपाल (नान) ले अत्यावश्यक राहत सामग्री हस्तान्तरण गरेको छ।
सरकारी राहत कोषमा १३ अर्ब भन्दा बढी रकम जम्मा भएपनि बाढी पिडित जनताहरु अहिले पनि विभिन्न शिबिर र आफन्तकोमा आश्रय लिई बसेको अवस्थामा बिज्ञापन एजेन्सिहरुको संस्था राष्ट्रिय विज्ञापन संघ नेपाल (नान) तथा विज्ञापन व्यवसायीहरूबाट संकलित रकम सिधै पिडितहरुको हातमा पुग्नसकोस भनेर खरिद गरिएका राहत सामग्री बालाजुमा
आयोजित एक कार्यक्रमबीच विदुर नगरपालिका–७, तुप्चे, नुवाकोटका वडा अध्यक्ष रविन्द्र नेपालको संयोजकत्वमा कविन्द्र अधिकारी, बासु अधिकारी र सुदीप अधिकारीलाई हस्तान्तरण गरिएको हो। राहत हस्तान्तरण कार्यक्रममा बोल्दै नानका अध्यक्ष प्रदीपप्रसाद कोइरालाले प्राकृतिक विपद्को यस कठिन समयमा पीडित नागरिकको घाउमा थोरै भए पनि मलम लगाउनु सामाजिक दायित्व भएको बताए। ‘सेवा नै धर्म हो’ भन्ने मूल मन्त्रलाई आत्मसात् गर्दै अध्यक्ष कोइरालाले आगामी दिनमा पनि नानले यस्ता मानवीय तथा सामाजिक उत्तरदायित्वका कार्यलाई निरन्तरता दिने प्रतिबद्धता व्यक्त गरे।
राहत सामग्री हस्तान्तरण कार्यक्रममा नानका संस्थापक अध्यक्ष धर्मेन्द्र काजी श्रेष्ठ, वरिष्ठ उपाध्यक्ष अमृतकुमार पन्थी, कोषाध्यक्ष अरुण अर्याल तथा कार्यसमिति सदस्य अदिप पाठकलगायत पदाधिकारीहरूको उपस्थिति रहेको थियो। संघका तर्फबाट प्रभावित क्षेत्रका लागि झुल, जुत्ता–चप्पल, ब्ल्यांकेट तथा भाँडाकुँडा (थाल, कचौरा र गिलास) हस्तान्तरण गरिएको छ। राहत सामग्री बुझ्दै कविन्द्र अधिकारीले कठिन परिस्थितिमा विपद् पीडितहरूका लागि महत्त्वपूर्ण सहयोग पुर्याएकोमा राष्ट्रिय विज्ञापन संघ नेपाल (नान) प्रति हार्दिक आभार व्यक्त गरे।
उक्त राहत कार्यक्रममा विभिन्न संघ संस्थाहरु र व्याक्तिहरुले देश विदेशबाट सहयोग गरेका थिए । वडाको समन्वयमा पिडितहरुलाई आवश्यक पर्ने ग्यास चुलो, सिलिण्डर, सरसफाईका समान, भाँडाकुँडा, खाद्यय सामाग्री लगाएतका समानहरु वितरण गरिएको थियो । उक्त अवसरमा ४७ भन्दा बढि घरपरिवार लाभान्वित भएका छन । उहाँहरुको अवको चिन्ता आफन्तको गुमाएको पिडासँगै बाच्नेहरुकोलागी पुर्नस्थापना, बालबालिकाको पालनपोषण तथा शिक्षाको विषयमा सरकारले दिर्घकालिन योजना बनाएर व्यवस्थित गरिदियोस, यसरी सधै शिविर र आफन्तकोमा लामो समय बस्न नपरोस भन्ने रहेको छ ।
