काठमाडौं महानगरपालिका क्षेत्रभित्र सञ्चालित ९२ वटा संस्थागत विद्यालयको अनुमति वा स्वीकृति रद्द गर्ने प्रक्रिया अघि बढाएको छ ।
२०८३ भाद्र ०६, शनिबार ।
महानगरपालिकाको शिक्षा विभागले ९२ वटा विद्यालयलाई अनुमति वा स्वीकृति रद्द गर्नुपर्ने कारणबारे ३५ दिनभित्र आवश्यक कागजातसहित आफ्नो विवरण तथा जवाफ पेस गर्न सूचना जारी गरेको हो । प्रचलित कानुनअनुसार अनुमति वा स्वीकृति लिएर सञ्चालनमा रहेका तर हाल अनुमति खारेज गर्नुपर्ने अवस्थामा रहेका विद्यालयलाई विभागले निर्धारित समयभित्र आवश्यक प्रमाणसहित उपस्थित हुन भनेको छ ।
शिक्षा विभागका प्रमुख नवराज ढकालका अनुसार शिक्षा ऐन, २०७५ को दफा ३६ बमोजिम अनुमति वा स्वीकृति रद्द गर्नुपर्ने देखिएपछि सम्बन्धित विद्यालयलाई स्पष्टीकरणको अवसर दिइएको हो । तोकिएको अवधिमा चित्तबुझ्दो जवाफ वा आवश्यक कागजात प्राप्त नभए अनुमति वा स्वीकृति रद्द गर्ने प्रक्रिया अघि बढाइने उनले बताए । महानगरपालिकाले यसअघि पनि कागजमा मात्र दर्ता भएर व्यवहारमा सञ्चालनमा नरहेका संस्थागत विद्यालयको स्थलगत अनुगमन गरी अनुमति खारेज गर्ने प्रक्रिया अघि बढाउने निर्णय गरेको थियो । नगर शिक्षा समितिको बैठकले लामो समयदेखि सञ्चालनमा नरहेका तथा कागजी रूपमा मात्रै अस्तित्वमा रहेका विद्यालयको अनुमति खारेज गर्ने प्रक्रिया अघि बढाउने निर्णय गरेको थियो ।
महानगरपालिकाले संस्थागत विद्यालयको सञ्चालनसँगै कक्षा तथा विषय थप, विद्यालयको नाम र स्थान परिवर्तन तथा स्वामित्व परिवर्तनलगायत विषयमा पनि प्रचलित कानुन र निर्धारित मापदण्डअनुसार प्रक्रिया अघि बढाउँदै आएको जनाएको छ । ९२ विद्यालयसम्बन्धी पछिल्लो सूचनाले महानगरभित्र दर्ता भएर सञ्चालनमा नरहेका वा कानुनी मापदण्ड पूरा नगरेका संस्थागत विद्यालयको अभिलेख व्यवस्थापन तथा नियमनलाई थप कडाइ गर्ने संकेत गरेको छ ।
