वैशाख १५ गते बाट विद्यालयमा पठनपाठन सुरु गर्ने काठमाडौं महानगरको निर्णय
२०८३ बैशाख १०, बिहीबार ।
काठमाडौं महागरपालिकाले आज विद्यालय सञ्चालन सम्बन्धमा एक सूचना प्रकाशित गर्दै नयाँ शैक्षिक सत्रसँगै विद्यालयहरुमा पठनपाठन पनि वैशाख १५ बाट सुरु गर्ने निर्णय गरेको छ । संघीय सरकारले वैशाख २१ गतेबाट मात्र पठनपाठन गराउने निर्णयलाई काठमाडौं महानगरले अवज्ञा गरेको हो । महानगरको शिक्षा विभागले एक सूचना जारी गर्दै नयाँ शैक्षिक सत्र वैशाख १५ गतेदेखि सुरु हुने गरी सञ्चालनमा ल्याउन विद्यालय र सरोकारवालाहरुलाई निर्देशन गरेको छ ।
सरकारको निर्देशन तथा काठमाडौं उपत्यका मेयर्सको अनुरोधलाई समेत मध्यनजर गर्दै शिक्षक–कर्मचारी तथा विद्यार्थीमा परेको प्रभाव र विद्यालय व्यवस्थापन समितिहरूको सुझावसमेतलाई आधार मानी यस्तो निर्णय गरिएको महानगरले जनाएको छ । संघीय सरकारले वैशाख १५ बाट नयाँ शैक्षिक सत्र सुरु गर्ने र वैशाख २१ बाट पठनपाठन सुरु गर्ने निर्णय गरेको थियो । यसैअनुसार स्थानीय तहहरुलाई पत्राचार गरिएको थियो । पत्र यसै साथ रहेको छ ।
