२०८२ भाद्र ४, बुधबार ।
संघीय मामिला तथा सामान्य प्रशासन मन्त्रालयले यही भदौ ६ गते ६ वटा स्थानीय तह(तीन नगरपालिका र तीन गाँउपालिका) लाई सम्मान गर्ने भएको छ । आर्थिक वर्ष २०८०/८१ को स्थानीय तह संस्थागत क्षमता स्वमूल्यांकन (लिसा)मा उत्कृष्ट नतिजा ल्याएका स्थानीय तह घोषणा गर्दै सम्मान गर्ने भएको हो । ‘गाउँपालिका र नगरपालिकाको कार्य प्रक्रिया र उपलब्धीको लेखाजोखा गरी शासकीय प्रक्रिया र विकास व्यवस्थापनमा गर्नुपर्ने सुधारका क्षेत्रहरू पहिचान गर्ने, आवधिक समीक्षाको आधार प्राप्त गर्ने र स्थानीय सरकारबीच स्वस्थ प्रतिस्पर्धीको भावना जागृत गराउने उद्देश्यले कार्यान्वयनमा रहेको स्थानीय तह संस्थागत क्षमता स्वमूल्यांकनको आव २०८०/८१ को नतिजाको गुणस्तर परीक्षण’ सम्पन्न भएको मन्त्रालयले जनाएको छ । संघीय मामिला तथा सामान्य प्रशासनमन्त्री भगवती न्यौपानेको उपस्थितिमा सम्मान गर्ने र स्थानीय शासन कार्यसम्पादन मूल्यांकन प्रणालीको शुभारम्भ गरिने कार्यक्रम तय भएको छ ।
सम्मानीत हुने पालिकाहरु
१) खैरहनी नगरपालिका चितवन,
२) तिलोत्तमा नगरपालिका रुपन्देही,
३) नीलकण्ठ नगरपालिका धादिङ,
४) अर्जुनचौपारी गाउँपालिका स्याङजा,
५) बेनीघाट रोराङ गाउँपालिका धादिङ र
६. रुरुक्षेत्रगाउँपालिका गुल्मीलाई सम्मान गर्ने भएको हो ।
स्याङ्जाको अर्जुनचौपारी गाउँपालिका गण्डकी प्रदेश अन्तर्गत संघीय मामिला तथा सामान्य प्रशासन मन्त्रालयद्वारा सञ्चालित स्थानीय तह संस्थागत क्षमता स्वमूल्याङ्कन (लिसा) मा आ.व. २०८०/८१ का लागि प्रथम भएको छ । सेवा प्रवाह, योजना कार्यान्वयन, बजेट व्यवस्थापन, प्रशासनिक क्षमता, पारदर्शिता, जवाफदेहिता र सार्वजनिक सेवा प्रभावकारिताका आधारमा गरिएको मूल्याङ्कनमा अर्जुनचौपारीले उच्चतम अंक ल्याउँदै देशकै उत्कृष्ट पालिकाको स्थान हासिल गरेको हो ।
कमजोर अवस्थाबाट मोडेल पालिकासम्मको यात्रा केही वर्षअघिसम्म पूर्वाधार र सेवाप्रवाहमा कमजोर ठानिएको अर्जुनचौपारी गाउँपालिका अहिले देशैभर उत्कृष्ट प्रदर्शन गर्ने पालिकामा रुपान्तरण भएको छ । यस परिवर्तनको श्रेय गाउँपालिकाका अध्यक्ष प्रकाश तिवारीको नेतृत्वलाई दिइन्छ । पदभार सम्हाल्दै उनले पारदर्शी प्रशासन, युवा सहभागिता, डिजिटल प्रविधिको प्रयोग, नवप्रवर्तन र समावेशी योजनालाई प्राथमिकतामा राखे । यसले पालिकाको समग्र व्यवस्थापन क्षमतामा गुणात्मक सुधार ल्याएको छ ।
अनलाइनखबरले सार्वजनिक गरेको ‘४० प्रभावशाली युवा’ को सूचीमा अध्यक्ष तिवारीको नाम समावेश हुनुले पनि उनको नेतृत्व, क्षमता र राष्ट्रिय प्रभावलाई थप पुष्टि गरेको छ । यो उपलब्धि गाउँपालिकाका स्थानीय बासिन्दाका लागि मात्र नभई गण्डकी प्रदेश र देशभरकै लागि गौरवको विषय बनेको छ ।
