गृहसचिव राजकुमार श्रेष्ठले सशस्त्रका नवनियुक्त आइजिपी नारायणदत्त पौडेललाई लगाइदिए दर्ज्यानी चिह्न ।
२०८३ बैशाख २१, सोमबार ।
सशस्त्रका आइजिपी राजु अर्याल वैशाख १८ गतेदेखि अवकाश हुने भएपछि वैशाख १४ गते बसेको मन्त्रिपरिषद् बैठकले सशस्त्र प्रहरी बलको १३औं आइजिपीमा नारायणदत्त पौडेललाई नियुक्त गरेको थियो। सशस्त्र प्रहरी बलका नवनियुक्त आइजिपी नारायणदत्त पौडेलले आज सोमबार गृहसचिव राजकुमार श्रेष्ठद्धारा दर्ज्यानी प्रदान गरेको छन्। अब उहाँ आइजिपी भैसके पछि संस्थाकालागी विभिन्न चुनौतीहरु सामना गर्नुपर्ने छ ।
सरुवा, बढुवा र पदस्थापनलाई थप पारदर्शी, पूर्वानुमान योग्य बनाउन सूची प्रकाशनसम्म गर्ने काम अर्यालको पालामा भएको थियो । अब यसलाई निरन्तरता दिएर सरुवा बढुवालाई पूर्वानुमान बनाइराख्ने चुनौती नवनियुक्त आईजीपी पौडेलमाथि छ । अनलाइन बिदा प्रणाली र युनिटहरूमा डिजिटल हाजिरीको सुरुवात, आर्थिक पारदर्शिताका लागि ‘डिसिप्लिनसरी ट्र्याकिङ एन्ड एक्सन युनिट’ स्थापना गरिएको छ । यसले आर्थिक अनियमिततामा कोही सशस्त्र प्रहरी देखिएमा छानबिन गरेर कारबाहीसम्म गर्दै आएको छ । यस्ता युनिटहरूलाई चलायमान बनाएर थप प्रभावकारी बनाउने काममा पौडेलले कति सक्रियता देखाउँछन् भन्ने प्रश्न पनि सँगै उठेको छ । सीमा सुरक्षालाई थप चुस्त राख्ने भन्दै अहिले सीमामा थप निगरानी बढाइएको छ । बालेन शाह नेतृत्वको सरकार गठन भएपछि पनि अहिले सीमामा सशस्त्र प्रहरीका थप जनशक्ति खटाइएको छ । राजस्व चुहावटदेखि, तस्करी, आपराधिक गतिविधि, क्रस बोर्डर क्राइम जस्ता विषयहरू दिनहुँजसो बढिरहेका छन् ।
सशस्त्रका आइजिपी नारणदत्त पौडेलको परिचय।
उनले २०५४ सालमा प्रहरी निरीक्षकका रूपमा नेपाल प्रहरीबाट सेवा सुरु गरेका थिए र २०५८ सालमा सशस्त्र प्रहरी बलमा स्थानान्तरण भएका हुन्। एमए सम्म अध्ययन गरेका पौडेल करिब तीन दशक लामो सुरक्षा सेवाको अनुभव भएका अधिकारीका रूपमा चिनिन्छन्। सेवाकालमा उनले रोल्पामा स्ट्राइकिङ टोली कमाण्डरदेखि झापाको बिर्तामोड इलाका प्रहरी कार्यालय प्रमुखसम्मका जिम्मेवारी सम्हालेका थिए।त्यसपछि सशस्त्र प्रहरी बलमा उनले दाङ, बर्दिया लगायतका क्षेत्रमा सुरक्षा नेतृत्व गर्दै सीमा सुरक्षा, प्रशासन, मानव स्रोत तथा कार्य विभागमा महत्वपूर्ण भूमिका निर्वाह गरेका छन्। पौडेलले सशस्त्र प्रहरीको नायव उपरीक्षकदेखि अतिरिक्त महानिरीक्षक हुँदै आइजिपीसम्मको यात्रा तय गरेका हुन्।उनी लुम्बिनी र गण्डकी प्रदेशका बाहिनीपतिको रूपमा समेत काम गरिसकेका छन्।उनले संयुक्त राष्ट्रसंघीय शान्ति मिसनअन्तर्गत लाइबेरिया र कोसोभोमा पनि सेवा गरेका छन्। साथै अमेरिका, इटाली, चीन, श्रीलंका लगायत देशमा सुरक्षा, आतंकवाद नियन्त्रण र नेतृत्व विकाससम्बन्धी तालिम लिएका छन्।उत्कृष्ट सेवाका लागि पौडेलले सुप्रबल जनसेवाश्री, प्रबल जनसेवाश्री, गोरखा दक्षिणबाहु लगायतका पदक प्राप्त गरेका छन्।
