नयाँ बानेश्वर व्यापार व्यवसायी संघको अध्यक्षमा रमेशमान शाक्य र सचिबमा शिबलाल न्यौपाने सहितको टिम निर्वाचित ।
२०८२ मंसिर २८, आइतबार ।
नयाँ बानेश्वर व्यापार व्यवसायी संघको अध्यक्षमा सुनचाँदी व्यवसायी रमेशमान शाक्य निर्वाचित हुनुभएको छ । संघको शनिबार सम्पन्न १६औं वार्षिक साधारणसभा एवं ८औं अधिवेशनबाट शाक्यको नेतृत्वमा नयाँ कार्यसमिति चयन भएको हो । अध्यक्ष शाक्यसहित उहाँले अघि सारेको १९ जनाको टिम नै निर्विरोध निर्वाचित भएको हो । यससँगै शाक्य संघको ८औं अध्यक्ष बन्न सफल हुनुभएको छ ।
संघको उपाध्यक्षमा खुलातर्फ रमेश रिमाल र ओमप्रकाश पोखरेल तथा महिला उपाध्यक्षमा विष्णुमाया खरेल निर्वाचित हुनुभएको छ । त्यस्तै सचिवमा शिवलाल न्यौपाने, सहसचिवमा उमेश चौलागाईं र कोषाध्यक्षमा रामचन्द्र श्रेष्ठ ९आरसी० चयन हुनुभयो । कार्यसमिति सदस्यहरुमा शारदा सापकोटा, बालकृष्ण पोखरेल, कृष्णप्रसाद लामिछाने, शान्ता कार्की, गुरुप्रसाद अधिकारी, सुनज राजभण्डारी, माधव श्रेष्ठ, सचिन्द्र कुसी, विपिन केसी, सुमित्रा चौलागाईं, धनमाया फुयाल र प्रभुनाथ बास्तोला निर्वाचित भएको निर्वाचन समितिका संयोजक ज्योतिराम फुयालले जानकारी दिनुभयो ।
व्यवसायी शाक्यले संघका विभिन्न पदमा आठ वर्ष जिम्मेवारी पुरा गरिसक्नुभएको छ । उहाँ २०७० देखि २०७४ सम्म दुई कार्यकाल कार्यकारिणी सदस्यको भूमिकामा हुनुहुन्थ्यो भने २०७४ देखि २०७८ सम्म दुई कार्यकाल कोषाध्यक्ष हुनुहुन्थ्यो । २०७८ यता भने उहाँ कार्यसमितिबाहिरै रहेर संघका गतिविधिमा सक्रिय हुनुहुन्थ्यो ।
शाक्यले कार्यसमिति बाहिर रहेर पनि संघले आयोजना गर्ने कर शिक्षा एवं विभिन्न सामाजिक कार्यक्रमका साथै सदस्यहरुको हकहितका लागि अग्रपंक्तिमा रहेर आवाज उठाउँदै आउनुभएको थियो । लामो समयदेखि संघमा महत्वपूर्ण योगदान गरेकै कारण उहाँ ३७४ व्यवसायीका सर्वस्वीकार्य नेता बन्न सफल हुनुभएको हो । शाक्य २०८० देखि काठमाडौं सुनचाँदी व्यवसायी संघको कोषाध्यक्ष हुनुहुन्छ । उहाँ २०७७ सालमा संघको जनसम्पर्क अधिकारी बन्नुभएको थियो । त्यसअघि २०६३ सालमा उहाँ नेपाल सुनचाँदी व्यवसायी संघको कार्यकारिणी सदस्य निर्वाचित हुनुभएको थियो । शाक्य सन् २००६ को गोदावरी जेसिस अध्यक्ष तथा सन् २००७ को नेपाल जेसिसको राष्ट्रिय उपाध्यक्ष हुनुहुन्छ । त्यस्तै उहाँ नेपाल क्षयरोग निवारण संस्था ललितपुर शाखाका आजीवन सदस्य हुनुहुन्छ ।
अध्यक्ष निर्वाचित भएपछि शाक्यले नयाँ बानेश्वरको व्यापार व्यवसायलाई पुरानै अवस्थामा फर्काउन दत्तचित भएर काम गर्ने घोषणा गर्नुभयो । वीरेन्द्र अन्तर्राष्ट्रिय सम्मेलन केन्द्रलाई प्रतिनिधिसभा बैठक स्थल बनाइएपछि नयाँ बानेश्वर हड्ताल र विरोध प्रदर्शनको केन्द्र बनेको छ, उहाँले भन्नुभयो, अब संसद भवन सिंहदरबारभित्रै बनेपछि सम्मेलन केन्द्रले पुरानै गतिविधि सञ्चालन गर्छ, बानेश्वरको व्यापार पनि फर्किन्छ । सम्मेलन केन्द्रको पुनर्निर्माणलाई तीव्रता दिन सम्बन्धित निकायलाई घच्घच्याउने उहाँको योजना छ । त्यस्तै पार्किङ अभावमा पनि बानेश्वरको व्यापार प्रभावित भएको उहाँले बताउनुभयो । पार्किङका लागि काठमाडौं महानगरपालिका र वडा नम्बर १० सँग समन्वय गरेको काम अघि बढाउनेछु, अध्यक्ष शाक्यले भन्नुभयो ।
