०५ चैत्र २०८१ ।
प्रहरी महानिरीक्षकमा थापा, केयू उपकुलपतिमा वाग्ले र राष्ट्रिय विपद् जोखिम न्यूनीकरण प्राधिकरणको कार्यकारी प्रमुखमा भट्ट नियुक्त ।
५ चैत २०५१ मा निरीक्षकबाट प्रहरी सेवा प्रवेश गरेका आईजीपी बसन्तबहादुर कुँवर ३० वर्षे सेवा अवधिका कारण सोमबार अनिवार्य अवकाशमा गएपछि रिक्त हुन गएको महानिरीक्षक पदमा सोमबार बसेको मन्त्रिपरिषद बैठकले अतिरिक्त प्रहरी महानिरीक्षक दीपक थापालाई महानिरीक्षक (आईजीपी) मा बढुवा गर्ने निर्णय गरेको हो । थापा यसअघि केन्द्रीय अनुसन्धान ब्युरो (सीआईबी) मा प्रमुख थिए । महानिरीक्षकको दौडमा राष्ट्रिय प्रशिक्षण प्रतिष्ठानका प्रमुख सुदीप गिरी र काठमाडौं उपत्यका प्रहरी कार्यालय रानीपोखरीका प्रमुख टेकबहादुर तामाङ पनि थिए । वरीयता, ज्येष्ठता, कार्यदक्षता र कार्यसम्पादनका आधारमा थापा १ नम्बरमा, गिरी २ नम्बरमा र तामाङ ३ नम्बरमा थिए । नवनियुक्त आईजीपी थापा भक्तपुरका बासिन्दा हुन् । ८ मंसिर २०२८ मा सूर्यविनायक–८, सिपाडोलमा जन्मिएका उनले कानुनमा एलएलबी, राजनीतिशास्त्रमा एमए र जनप्रशासनमा एमपीए गरेका छन् । प्रहरी सेवामा आउनुअघि उनी शिक्षक थिए ।
यस्तै सरकारले काठमाडौं विश्वविद्यालय (केयू) को उपकुलपतिमा अच्युत वाग्लेलाई नियुत्त गरेको छ। उपकुलपति खोज तथा सिफारिसका लागि केयू सभाले संस्थापक उपकुलपति सुरेशराज शर्माको संयोजकत्वमा समिति गठन गरेको थियो । पाटन स्वास्थ्य विज्ञान प्रतिष्ठानका पूर्वउपकुलपति चिकित्सक अर्जुन कार्की र पूर्वसचिव जनार्दन नेपाल समितिमा सदस्य थिए । समितिले ३ जनाको नाम सिफारिस गर्न नसकेपछि एक महिनादेखि विवाद थियो । शुक्रबार शर्माले आफ्नोतर्फबाट ३ जनाको नाम सिफारिस गरेका थिए । त्यस्तै सोमबार कार्की र नेपालले ३ जनाको नाम सिफारिस गरेका थिए । छुट्टाछुट्टै रूपमा सिफारिस आएपछि कुलपति ओलीले वाग्लेलाई नियुक्ति दिने निर्णय गरेका हुन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी प्रमुखमा दिनेशप्रसाद भट्ट नियुक्त भएका छन्। मन्त्रिपरिषद्को बैठकले भट्टलाई प्राधिकरणको कार्यकारी प्रमुखमा नियुक्त गर्ने निर्णय गरेको हो। कार्यकारी प्रमुख नियुक्तिका लागि गठित सिफारिस समितिले भट्ट, सुमनकुमार कर्ण र मन्दिप सुवेदी गरी तीन जनाको नाम मन्त्रिपरिषद्मा सिफारिस गरेको थियो। बैतडी जिल्लाको दशरथचन्द नगरपालिका–४ मा जन्मनु भएका दिनेशप्रसाद भट्ट वातावरण तथा जलवायु परिवर्तनका अनुभवी विज्ञ हुन्। उनले त्रिभुवन विश्वविद्यालयअन्तर्गत इन्जिनियरिङ अध्ययन संस्थान पुल्चोक, थापाथलीलगायत विभिन्न क्याम्पसहरूमा करिब २० वर्ष अध्यापन गरिसकेका छन्।
उनले विश्व बैंक, एसियन विकास बैंक, संयुक्त राष्ट्रसंघीय विकास कार्यक्रम, विश्व स्वास्थ्य संगठन, खाद्य तथा कृषि संगठन, स्विस विकास सहयोग, फिनिस विकास संस्था र ग्रीन क्लाइमेट फण्ड जस्ता अन्तर्राष्ट्रिय संस्थाद्वारा सञ्चालित परियोजनाहरूमा परामर्शदाता भएर कार्य गरिसकेका छन्।
