कीर्तिपुरमा सुविधा सम्पन्न क्रिकेट रंगशाला निर्माण भएपछि दिन र रातमा समेत खेल हेर्न पाइने ।
२०८२ मंसिर ०१, सोमबार ।
सहरी विकास मन्त्रालय अन्तर्गतको संघीय सचिवालय निर्माण तथा व्यवस्थापन कार्यालयले आइतबार आयोजित कार्यक्रममा १० हजार सिट क्षमताको नयाँ प्यारापिट र ६ वटा फ्लड लाइट क्यानलाई बुझाएको हो। सहरी विकासमन्त्री कुलमान घिसिङ स्वयं कीर्तिपुरमै उपस्थित भएर सरकारले निर्माण गरेका प्यारापिट र फ्लड लाइटसहितको अत्याधुनिक क्रिकेट पूर्वाधारको पहिलो चरणको काम पूरा गरी नेपाल क्रिकेट संघ (क्यान) लाई औपचारिक रूपमा हस्तान्तरण गरेको छ। उक्त कार्यक्रममा मन्त्रीका साथै शहरी विकास मन्त्रालयका सचिब श्री गोपाल प्रसाद सिग्देल,संघीय सचिवालय निर्माण तथा व्यवस्थापन कार्यालयका प्रमुख श्री चक्रवती कण्ठ, शहरी विकास विभागका महानिर्देशक श्री रविन्द्र बोहरा, पुनर्निर्माण तथा पुनर्स्थापनाःप्रबलिकरण महाशाखाका शाखा प्रमुख श्री प्रकाश अर्याल, क्यान अध्यक्ष चतुरबहादुर चन्द, राष्ट्रिय खेलकुद परिषद्का सदस्य–सचिव टंकलाल घिसिङ लगाएत अन्य खेलकुदसँग सम्बन्धित विशिष्ट व्याक्तिहरुको उपस्थिति रहेको थियो । पहिलो चरणको काम सम्पन्न गरी हस्तान्त्रण भइसके पछि आजबाट एनपिएल २ का खेलहरु सञ्चालन हुनेछन र नेपाली क्रिकेट प्रेमीहरुले खेलको आनन्द लिनेछन ।
निर्माण ढिलाइ, ठेक्का र लागत
२०७९ चैतमा तत्कालीन प्रधानमन्त्री पुष्पकमल दाहालले फ्लड लाइट जडान प्रक्रिया अघि बढाउने निर्देशन दिएका थिए भने २०८१ असार ३१ मा ओली सरकारकै पहिलो बैठकले कीर्तिपुरमा सुविधा सम्पन्न रंगशाला निर्माण गर्ने निर्णय गरेको थियो। तर तोकिएको ३ सय दिनभित्र काम सम्पन्न हुन नसकेपछि निर्माण कम्पनीलाई मन्त्रालयले दैनिक ०.५ प्रतिसतका दरले करिब २ लाख रुपैयाँका दरले हर्जाना तिर्न पनि लगाएको थियो।
पहिलो चरणको ठेक्का अन्तर्रगत प्यारापिट निर्माण : लागत ४३ करोड ७७ लाख, क्षमता १०,००० सिट, निर्माणकर्ता बीकेओआई–केसीडीसी–बिजी जेभी, फ्लड लाइट जडान : लागत ४२ करोड १९ लाख, जडानकर्ता विशाण–ईश्वरी जेभीले पाएको थियो । मन्त्री घिसिङले आफूले स्थलगत अनुगमन गरेका कारण कामले तीव्रता पाएको र दोस्रो चरणको ठेक्का प्रक्रिया पनि छिट्टै अघि बढाइने बताउनुभयो। साथै आगामी २–३ वर्षभित्र गुरुयोजना पूरा गरी पूर्ण सुविधा सम्पन्न अन्तर्राष्ट्रिय मापदण्डको क्रिकेट मैदान निर्माण गरिन्छ मन्त्री घिसिङले भन्नु भयो ।
हस्तान्तरण कार्यक्रममा क्यान अध्यक्ष चतुरबहादुर चन्दले कीर्तिपुर रंगशाला डे–नाइट क्रिकेट सम्भव हुने आधुनिक रंगशालाको रूपमा रुपान्तरण भएको बताए। प्रत्येक प्रदेशमा यस्तो पूर्वाधार बनाए क्रिकेट विकास तीव्र हुने उनको भनाइ थियो। राष्ट्रिय खेलकुद परिषद्का सदस्य–सचिव टंकलाल घिसिङले सहरी विकास मन्त्रालय र खेलकुद मन्त्रालयको संयुक्त पहलमा काम छोटो समयमा सम्पन्न भएको उल्लेख गर्दै दोस्रो चरण पनि छिट्टै अघि बढ्ने विश्वास व्यक्त गरे।
