पूर्व गृहमन्त्री रमेश लेखक पक्राउ, पूर्वप्रधानमन्त्री केपी शर्मा ओली पक्राउ पर्दै ।
२०८२ चैत्र १४, शनिबार ।
भदौ २३ गते काठमाडौँको बानेश्वरमा भएको गोलीकाण्डमा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई कार्की आयोगले दोषी ठहर गरेको थियो । पूर्वन्यायाधीश गौरीबहादुर कार्की नेतृत्वको जाँचबुझ आयोगले उनीहरूलाई जिम्मेवार ठहर गरेको हो । शुक्रबार नयाँ सरकार गठन भए लगत्तै बसेको मन्त्रिपरिषद् बैठकले गौरीबहादुर कार्की नेतृत्वको जाँचबुझ आयोगले तयार पारेको प्रतिवेदन कार्यान्वयन गर्ने निर्णय गरेको थियो । सोही निर्णयपछि गृहमन्त्री सुधन गुरुले रातभर नेपाल प्रहरी र सशस्त्र प्रहरी बलका उच्च अधिकारीहरूसँग निरन्तर छलफल गरेका थिए । प्रहरीले सशस्त्र प्रहरीको सहयोगमा भक्तपुरको कटुन्जेबाट लेखकलाई पक्राउ गरेको हो। उनलाई जरुरी पक्राउ पुर्जी दिएर पक्राउ गरिएको बताइएको छ।
त्यस्तै पूर्वप्रधानमन्त्री के.पी. शर्मा ओलीलाई पनि आजै पक्राउ गर्ने जनाइएको छ । पूर्वप्रधानमन्त्री केपी शर्मा ओलीको भक्तपुरस्थित गुण्डु निवास अगाडि शनिबार बिहानदेखि बाक्लो सङ्ख्यामा प्रहरी परिचालन गरिएको छ । पक्राउ पर्न सक्ने हल्ला फैलिएको अवस्थामा शुक्रबार रातिदेखि नै उक्त निवासमा नेकपा एमालेका नेता तथा कार्यकर्ताहरू भेला भएका थिए । बिहान करिब ४ः४० बजे ओली निवासअघि बाक्लो सङ्ख्यामा परिचालन गरिएको हो ।
