२०८३ जेठ २९, शुक्रबार ।
आज बिहान १२.४५ बाट शुरु भएको फिफा विश्वकप २०२६ को आयोजना संयुक्त राज्य अमेरिका, क्यानडा र मेक्सिकोले गरेका छन्। प्रतियोगिता ११ जुनदेखि १९ जुलाई २०२६ सम्म सञ्चालन हुनेछ। यो विश्वकप १६ विभिन्न शहरमा आयोजना हुँदैछ, जसले उत्तर अमेरिकालाई विश्व फुटबलको केन्द्र बनाएको छ।
सह–आयोजक मेक्सिकोले फिफा विश्वकप २०२६ को उद्घाटन खेलमा दक्षिण अफ्रिकालाई २–० ले पराजित गर्दै प्रतियोगिताको सुखद सुरुआत गरेको छ। खेलमा कुल तीन खेलाडीले रातो कार्ड पाएका थिए। उत्कृष्ट प्रदर्शन गरेका जुलियन क्विन्योनेसले ९ औं मिनेटमा प्रतियोगिताको पहिलो गोल गर्दै मेक्सिकोलाई अग्रता दिलाए। उनले पहिलो हाफमै अर्को गोल गर्ने अवसर पनि सिर्जना गरेका थिए। अर्को गोल दोस्रो हाफको ५० औं मिनेटमा दक्षिण अफ्रिकाका याया सिथोलेले ब्रायन गुटिएरेजलाई फल गरेपछि रातो कार्ड पाए। त्यसपछि मेक्सिकोका अनुभवी स्ट्राइकर राउल जिमेनेजले ६७ औं मिनेटमा दोस्रो गोल गर्दै टोलीको जित सुनिश्चित गरे।
दक्षिण अफ्रिकाका थेम्बा ज्वानेलाई हिंसात्मक व्यवहारका कारण ८४ औं मिनेटमा मैदानबाट बाहिर पठाइएपछि टोली थप दबाबमा आयो भने टोली ९ खेलाडीमा समेटियो। तर रातो कार्ड पाउने अन्तिम खेलाडी उनी मात्र थिएनन्। इन्जुरी समयमा मेक्सिकोका डिफेन्डर सेजार मोन्टेसले पनि लापरवाहीपूर्ण ट्याकल गरेपछि उनले पनि रातो कार्ड पाए। विश्वकपको उद्घाटन खेलमै तीन खेलाडीले रातो कार्ड पाएपछि प्रतियोगिता अस्वाभाविक र विवादास्पद सुरुआतजस्तै देखिएको छ। जितसँगै मेक्सिकोले तीन अंक जोडेको छ। यसै समूहको अर्को खेलमा बिहान ७ः४५ बजे दक्षिण कोरिया र चेक रिपब्लिकले प्रतिस्पर्धा गर्दैछन्।
४८ टोली, १०४ खेल
यसअघि विश्वकपमा ३२ टोली सहभागी हुने गर्थे। तर २०२६ संस्करणबाट टोली संख्या बढाएर ४८ पुर्याइएको छ। टोलीहरूलाई १२ समूहमा विभाजन गरिएको छ र प्रत्येक समूहमा चार टोली रहनेछन्। समूह चरणपछि प्रत्येक समूहका शीर्ष दुई टोली तथा उत्कृष्ट आठ तेस्रो स्थानका टोली गरी ३२ टोली नकआउट चरणमा प्रवेश गर्नेछन्। यससँगै पहिलो पटक ‘राउन्ड अफ ३२’ पनि समावेश गरिएको छ।
विश्व फुटबलको नयाँ अध्याय
फिफा विश्वकप २०२६ केवल एउटा खेल प्रतियोगिता मात्र होइन, विश्व फुटबलको नयाँ युगको सुरुआत पनि हो। ठूलो सहभागिता, नयाँ ढाँचा, अत्याधुनिक पूर्वाधार र करोडौं दर्शकको उत्साहले यो संस्करणलाई इतिहासकै सबैभन्दा भव्य विश्वकप बनाउने अपेक्षा गरिएको छ। फुटबलप्रेमीहरूका लागि आगामी केही साताहरू रोमाञ्चक प्रतिस्पर्धा, अविस्मरणीय क्षण र नयाँ इतिहासको साक्षी बन्ने अवसरका रूपमा रहनेछन्।
