(काठमाण्डौ) कार्तिक १० आइतबार
‘साफ महिला च्याम्पियनसिप २०२४’ अन्तर्गत नेपाल र भारतबीच दोस्रो सेमिफाइनल खेल सुरु भएको छ । खेल हेर्नका लागि त्रिपुरेश्वरस्थित दशरथ रंगशालामा दर्शकको भिड लागेको छ । १४ हजार दर्शक क्षमताको रंगशालाका सबै टिकट बिक्री भइसकेको जनाइएको छ। नेपाल र भारतबीच साफको सेमिफाइनलमा दोस्रो पटक प्रतिस्पर्धा हुन लागेको हो। यसअघि सन् २०२२ मा दशरथ रंगशालामै भएको सेमिफाइनलमा नेपालले भारतलाई पराजित गरेको थियो। यद्यपि नेपाल फाइनलमा बंगलादेशसँग पराजित भएको थियो। आजको खेलमा विजयी हुने टोलीले उपाधिका लागि बुधबार बंगलादेशसँग खेल्नेछ। आजै भएको पहिलो सेमिफाइनलमा बंगलादेशले भुटानलाई ७-१ ले हराएर दोस्रो पटक फाइनलमा स्थान पक्का गरेको थियो।
