काठमाण्डौ महानगरपालिकाद्धारा लिइएको आधारभूत तह (कक्षा ८)को परीक्षाफल प्रकाशित ।
२०८२ चैत्र २६, बिहिबार ।
काठमाडौँ महानगरपालिकाभित्रका विद्यालयहरुबाट यस वर्ष लिइएको आधारभूत तह (कक्षा ८) को
परिक्षफल हिजो साँझ प्रकाशित गरेको छ । गत गएको वर्षको तुलनामा ८.५ प्रतिशत वढी विद्यार्थी ग्रेडेड भएका छन् । गएको वर्ष ७२.७ प्रतिशत विद्यार्थी ग्रेडेड थिए । यस वर्ष ८१.२ प्रतिशत विद्यार्थी ग्रेडेड छन् । सामुदायिक विद्यालयतर्फ हेर्ने हो भने गएको वर्षभन्दा यस वर्ष १०.५५ प्रतिशत धेरै विद्यार्थी ग्रेडेड छन् ।
गएको वर्ष ५१.८ प्रतिशत विद्यार्थी ग्रेडेड थिए । यस वर्ष ६२.३५ प्रतिशत विद्यार्थी ग्रेडेड छन् । काठमाडौँ महानगरपालिकाको आधारभूत तहको परीक्षा समितिले आज परीक्षाफल प्रकाशित गरेको हो । समितिका अध्यक्ष एवं शिक्षा अधिकारी नमराज ढकालको अध्यक्षतामा बसेको बैठकले परीक्षाफल प्रकाशन गर्ने निर्णय गरेको हो । यस वर्ष १४ हजार ७२८ जना अर्थात् ८१।२५ विद्यार्थी ग्रेडेड भएका छन् । यसमा ८ हजार ९२ जना छात्र र ६ हजार ६३६ जना छात्रा छन् । ग्रेडेड विद्यार्थीहरुमा सामुदायिक विद्यालयबाट १ हजार ५०३ जना छात्र र १ हजार ३५० जना छात्रा गरी २ हजार ८५३ जना छात्रछात्रा छन् । निजी तथा संस्थागत विद्यालयबाट ६ हजार ५८९ जना छात्र र ५ हजार २८६ जना छात्रा गरी ११ हजार ८७५ जना छात्रछात्रा छन् ।
परीक्षामा सहभागी हुन ४९४ वटा विद्यालयका १९ हजार ११७ जना विद्यार्थीले फाराम भरेका थिए । जसमध्ये ९३८ जना विद्यार्थी परीक्षामा अनुपस्थित रहे । फाराम भर्नेमा १० हजार ७४५ जना छात्र र ८ हजार ३७२ जना छात्रा थिए । विद्यालयको प्रकृतिका आधारमा हेर्दा, २ वटा कारागार र एउटा विशेषसहित ७७ वटा सामुदायिक विद्यालयका ४ हजार ६१४ जना, २० वटा वैकल्पिक विद्यालयका ८३७ जना, ६ वटा धार्मिक विद्यालयका ७० जना र ३९१ वटा संस्थागत विद्यालयका १३ हजार ५९६ जना विद्यार्थी थिए । गएको वर्ष १८ हजार २९४ जना विद्यार्थीले परीक्षा दिएका थिए । यसरी हेर्दा गएको वर्षभन्दा यस वर्ष परीक्षामा सहभागी हुन फाराम भर्नेको संख्या ८२३ जना बढी थियो । यस वर्ष ३ हजार ४५१ जना विद्यार्थी ननग्रेडेड छन् । जसमा छात्रको संख्या २ हजार ५४ जना अर्थात् २०.२४ प्रतिशत छात्राको संख्या १ हजार ३९७ जना अर्थात् १७.३९ प्रतिशत छ ।
विद्यालयहरुले इमिसमा लग इन गरेर म्यानेज एक्ज्याममा ग्रेड वाइज लेजरबाट परीक्षाफल हेर्न सक्नेछन् । विद्यार्थीहरुलाई नतिजामा चित्त नबुझे पुनर्योगका लागि २ सय रुपियाँ दस्तुर तिरेर चैत २९ गतेभित्र विद्यालयमा निवेदन दिन सकिनेछ । ननग्रेडेड विद्यार्थीहरुको वैशाख ६ गते विहान १० बजेदेखि स्रोत केन्द्रहरुमा परीक्षा सुरु हुनेछ । १२ गते परीक्षा सकिनेछ । पहिलो दिन अंग्रेजी, दोस्रो दिन नेपाली त्यसपछि क्रमशः विज्ञान तथा प्रविधि, गणित, सामाजिक अध्ययन तथा मानव मूल्य शिक्षा, स्वास्थ्य, शिक्षा तथा सिर्जनात्मक कला र अन्तिम दिन स्थानीय भाषाको परीक्षा हुनेछ ।
यस वर्ष होम सेन्टर नपर्ने गरी ४७ वटा सामुदायिक विद्यालयमा र १० वटा संस्थागत विद्यालयमा गरेर ५७ वटा विद्यालयमा परीक्षा केन्द्र कायम गरिएको थियो । केन्द्रीय बहिरा माध्यमिक विद्यालय, नक्सालमा अध्ययनरत विद्यार्थीहरू विशेष प्रकृतिका ९बहिरा० भएकाले उनीहरूको विशिष्ट आवश्यकतालाई ध्यानमा राखी सोही विद्यालयमा नै परीक्षा केन्द्र कायम गरिएको थियो । जगन्नाथ देवल माध्यमिक विद्यालय र बन्दी विकास आधारभूत विद्यालय कारागार (जेल) भित्र सञ्चालित रहेको र सुरक्षा संवेदनशीलताका कारण विद्यार्थीहरू बाहिर जान सहज नहुने हुँदा, ती विद्यालयहरूको परीक्षा केन्द्र त्यही विद्यालयमा नै कायम गरिएको थियो । यसको नतिजा आफ्नो विद्यालयमा सम्पर्क गरी जानकारी लिन सक्नुहुने छ । सूचना यहाँ राखिएको छ
